Şəhər

Bakının daha üç rayonunda qarlı hava şəraitinə hazırlıq müzakirə olunub

Paytaxtın Yasamal, Nizami və Xəzər rayon icra hakimiyyətlərində qış mövsümünə və güclü qar yağmasına hazırlıq məqsədilə müşavirələr təşkil edilib.

Bakı Şəhər İcra Hakimiyyətinin tapşırıqlarına əsasən, paytaxt rayonlarında kommunal və təsərrüfat xidmətlərinin, təşkilatların və özəl sektorun iştirakı ilə qışa hazırlıq işləri davam etdirilir. Növbəti belə görüşlər Yasamal, Nizami və Xəzər rayonlarında reallaşdırılıb.

Müşavirələr zamanı qərargahların və aidiyyəti qurumların rəhbərlərinə qarlı günlərdə vəzifələrini tam yerinə yetirmək üçün hazır olmaq tapşırılıb. Qurumlara lazım olan qədər kürək, bel, ling kimi alətlərin yığılması, duz ehtiyatının yaradılması və xüsusi texnikanın vəziyyətinin yoxlanılması tapşırığı verilib.

Küçə və məhəllələrin təmizlənməsinə cavabdeh şəxslərin siyahısı tərtib olunub. Prosesə kommunal texnika ilə yanaşı bələdiyyə, idarə və özəl qurumların texnikalarının da cəlb olunması qərara alınıb, həmçinin ictimai iaşə obyektlərinə öz ərazilərini təmizləmək çağırışı edilib.